Hindistan Xarici İşlər Nazirliyinin rəsmi nümayəndəsi Rancir Caysval Azərbaycanın və Ermənistanın Şanxay Əməkdaşlıq Təşkilatına (ŞƏT) üzvlüyü ilə bağlı yayılan xəbərlərə münasibət bildirib.

Diplomat deyib ki, hər iki ölkənin müraciəti təşkilatın gündəmindədir:

“Bu il həm Ermənistan, həm də Azərbaycan ŞƏT-ə üzv olmaq üçün müraciət edib. Vaxt məhdudiyyəti səbəbindən bu məsələ ilə bağlı qərar Çinin Tiencin şəhərində üzv dövlətlər tərəfindən qəbul oluna bilmədi. Lakin hər iki ölkənin üzvlük məsələsi hələ də təşkilat tərəfindən nəzərdən keçirilir.”

Caysval, Hindistanın Azərbaycanın təşkilata daxil olmasına veto qoyması ilə bağlı iddiaları da bu açıqlama ilə şərh edib.

Bundan əvvəl mətbuatda Hindistanın Azərbaycanın ŞƏT-ə tamhüquqlu üzvlüyünə, Pakistanın isə Ermənistanın müraciətinə mane olduğu haqda xəbərlər yayılmışdı. Ermənistan Xarici İşlər Nazirliyi İslamabadın addımlarını şərh etməyib, hazırda üzvlük prosesinə dair detalların açıqlanmadığını, təşkilat daxilində isə “konstruktiv yanaşma” müşahidə olunduğunu bildirmişdi.

Xatırladaq ki, avqustun 31-də Çinin Tiencin şəhərində keçirilən sammitdə Azərbaycanın üzvlük məsələsinin həll olunmaması diqqət çəkmiş, media Hindistanın veto hüququndan istifadə etdiyini, Pakistanın isə buna cavab olaraq Ermənistanın müraciətini əngəllədiyini yazmışdı.