Azərbaycan Respublikasının Baş naziri Bakı şəhərinin sosial-iqtisadi inkişafı istiqamətində strateji əhəmiyyət daşıyan şəhərsalma təşəbbüslərinin dəstəklənməsi məqsədilə yeni İşçi qrupun yaradılması barədə sərəncam imzalayıb.

Sərəncama əsasən, İşçi qrupun rəhbəri Baş nazirin müavini Samir Şərifov təyin olunub.

İşçi qrupun rəhbərinin müavinləri:
• Mikayıl Cabbarov – iqtisadiyyat naziri
• Anar Quliyev – Dövlət Şəhərsalma və Arxitektura Komitəsinin sədri

İşçi qrupun üzvləri:
• Eldar Əzizov – Bakı Şəhər İcra Hakimiyyətinin başçısı
• Zaur Mikayılov – Dövlət Su Ehtiyatları Agentliyinin sədri
• Rəşad İsmayılov – ekologiya və təbii sərvətlər nazirinin birinci müavini
• Anar Kərimov – maliyyə nazirinin birinci müavini
• Rəhman Hümmətov – rəqəmsal inkişaf və nəqliyyat nazirinin müavini
• Adil Abdullayev – fövqəladə hallar nazirinin müavini
• Rövşən Nəcəf – SOCAR prezidenti
• Saleh Məmmədov – Azərbaycan Avtomobil Yolları Dövlət Agentliyinin İdarə Heyətinin sədri
• Balababa Rzayev – “Azərenerji” ASC-nin İdarə Heyətinin sədri
• Vüqar Əhmədov – “Azərişıq” ASC-nin sədri
• İlham Mirzəliyev – “Azəristiliktəchizat” ASC-nin sədri
• Mətin Eynullayev – Əmlak Məsələləri Dövlət Xidmətinin rəisi

İşçi qrupun vəzifələri

Yeni yaradılan quruma investorların təqdim etdiyi şəhərsalma investisiya layihələrinin baxılması və ilkin qiymətləndirilməsi, aidiyyəti dövlət qurumları arasında fəaliyyətin əlaqələndirilməsi, köçürülmə prosesinə nəzarət, eləcə də layihələrdən irəli gələn öhdəliklərin icrasına nəzarət tapşırılıb.

İlkin mərhələdə Bakı şəhərinin Böyükşor gölü ətrafı, Heydər Əliyev və Ziya Bünyadov prospektləri arasındakı ərazilər, həmçinin Heydər Əliyev adına Neft Emalı Zavodu ətrafı ərazilərdə dövlət-özəl tərəfdaşlığı modeli çərçivəsində konseptual layihələrin icrası planlaşdırılır.

Sərəncam imzalandığı gündən qüvvəyə minib.