Sentyabrın 19-da Gürcüstanın azərbaycanlıların kompakt yaşadığı Marneuli rayonunda baş verən insident ictimaiyyət arasında ciddi rezonans doğurub. Hadisə zamanı Marneuli Bələdiyyə Məclisinin sədr müavini Riçard Qiqaninin oğlu Mamuka Qiqani “Melody” şirniyyat evində çalışan azyaşlıdan gürcü dilində danışmağı tələb edib. Yeniyetmə cavab verə bilmədikdə, o, fiziki zorakılığa məruz qalıb. Bu an ətrafdakı sakinlərlə Qiqani arasında qarşıdurma yaranıb.

Hadisə yerinə hüquq-mühafizə orqanları cəlb olunub və Mamuka Qiqani polis şöbəsinə aparılıb. Yerli mətbuatın yaydığı görüntülərdə onun polis əməkdaşlarının göstərişlərinə tabe olmadığı, küçədə qışqıraraq qeyri-etik davranışlar sərgilədiyi əks olunub.

Məlumata görə, Riçard Qiqaninin digər oğlunun da bir neçə gün əvvəl başqa bir vətəndaşa qarşı fiziki zorakılıq törətdiyi iddia olunur. Bu hallar Marneulidə yaşayan azərbaycanlı əhali arasında narazılığın artmasına səbəb olub.

DİN istintaq başladığını açıqladı

Gürcüstan Daxili İşlər Nazirliyi insidentlə bağlı Cinayət Məcəlləsinin 126-cı maddəsi üzrə istintaq başladığını açıqlayıb. Nazirliyin məlumatına görə, Mamuka Qiqani saxlanılıb və ona 2 ilədək azadlıqdan məhrumetmə cəzası verilə bilər.

Hüquq müdafiəçiləri petisiya başladı

Hadisədən sonra hüquq müdafiəçisi Samirə Bayramova “Marneulidə azərbaycanlılara qarşı diskriminasiya və zorakılıq dayandırılsın!” adlı petisiya kampaniyasına start verib.

Petisiyada Gürcüstan hökumətindən və beynəlxalq insan hüquqları institutlarından aşağıdakı tələblər irəli sürülür:
• Riçard Qiqani və Tornike Mtvarelidze yerli idarəetmə vəzifələrindən azad edilsin, Mamuka Qiqani isə Marneuli Bələdiyyəsindən uzaqlaşdırılsın.
• Yerli idarəetmə strukturlarında diskriminasiya və tolerantlıq mövzularında məcburi maarifləndirmə proqramları tətbiq edilsin.
• İstintaqın tam şəffaf və müstəqil aparılması təmin olunsun, zərərçəkənlərə qarşı təzyiqlər dayandırılsın.
• Ayrı-seçkiliyə qarşı qanunların icrası gücləndirilsin və pozuntulara real sanksiyalar tətbiq olunsun.
• Təhsil, səhiyyə, məşğulluq və dövlət xidmətlərində bərabər imkanlar təmin olunsun.
• Gürcüstan Ombudsmanı və müstəqil nəzarət qurumları diskriminasiya halları ilə bağlı şikayətləri qərəzsiz araşdırsın.