Sumqayıt Kommersiya Məhkəməsində baxılan mübahisə zamanı məhkəmə prosesi iştirakçılarından biri – cavabdeh tərəfin nümayəndəsi işin gedişinə mane olub.

“Qafqazinfo”nun məlumatına görə, nümayəndə dəfələrlə əsassız vəsatətlər qaldıraraq prosessual davranış qaydalarını pozub. Məhkəmə bununla bağlı qərar qəbul edərək həmin şəxsə inzibati cərimə tətbiq edib.

Lakin daha sonra o, məhkəməyə təqdim etdiyi ərizədə hakimi təhqir edən ifadələr işlədib. Bu hərəkət məhkəməyə açıq hörmətsizlik kimi qiymətləndirilib və məhkəmənin nüfuzuna xələl gətirməklə yanaşı, proses iştirakçılarının hüquqlarının müdafiəsinə də mane olub.

Baş verən halları nəzərə alan məhkəmə xüsusi qərardad qəbul edərək materialları istintaq orqanına göndərib. Araşdırmalar nəticəsində nümayəndənin əməllərində Azərbaycan Respublikası Cinayət Məcəlləsinin 289.2-ci maddəsində (hakimə hörmətsizlik etmə) nəzərdə tutulan cinayət tərkibi müəyyən edilib.

Hazırda cinayət işi üzrə istintaq tədbirləri davam etdirilir.

Qeyd edək ki, məhkəmə proseslərində iştirak edən şəxslərin davranışları qanunla ciddi şəkildə tənzimlənir. Hakimin və ya digər iştirakçıların təhqir edilməsi yalnız etik pozuntu deyil, həm də cinayət məsuliyyəti yaradan əməldir.