Azərbaycanda struktur islahatları çərçivəsində dövlət idarəçiliyində yeni birləşmə gözlənilir. Məlumata görə, Ekologiya və Təbii Sərvətlər Nazirliyi ilə Dövlət Şəhərsalma və Arxitektura Komitəsi birləşdirilərək Şəhərsalma, Ekologiya və Təbi Sərvətlər Nazirliyi yaradılacaq.

Yaxın vaxtlarda bununla bağlı Prezident tərəfindən fərman imzalanacağı gözlənilir.

Struktur dəyişikliyi zamanı beynəlxalq təcrübə və effektiv idarəetmə amillərinin əsas götürüldüyü bildirilir. Qonşu Türkiyədə də bu model tətbiq olunur – ölkədə ekologiya və şəhərsalma məsələləri ilə Çevrə, Şəhərçilik və İqlim Dəyişikliyi Nazirliyi məşğul olur.

Oxşar təcrübə bir sıra Avropa ölkələrində də mövcuddur. Məsələn, Fransada Ekologiya, Davamlı İnkişaf, Nəqliyyat və Mənzil Təsərrüfatı Nazirliyi, İsveçrədə isə Ətraf Mühit, Nəqliyyat, Energetika və Rabitə Nazirliyi bu sahələri vahid qurum kimi idarə edir.

Yeni yaradılacaq nazirliyin məqsədinin şəhərsalma siyasəti ilə ekoloji idarəetməni inteqrasiya etmək və dövlət strukturlarının fəaliyyətini optimallaşdırmaq olduğu vurğulanır.