Dövlət Sərhəd Xidmətinin (DSX) Mətbuat Mərkəzi sentyabr ayı ərzində görülən əməliyyat tədbirlərinə dair məlumat yayıb.

Hesabat dövründə dövlət sərhədini pozduqlarına görə 26 nəfər saxlanılıb. Onlardan 4-ü Azərbaycan, 8-i İran, 3-ü Əlcəzair, 3-ü Əfqanıstan, 2-si Pakistan, 2-si İraq, 2-si Tacikistan, 1-i Rusiya və 1-i Mərakeş vətəndaşı olub.

Qanunsuz miqrasiya ilə mübarizə çərçivəsində saxtalaşdırılmış pasport və tarix möhürü ilə, eləcə də özgəsinə məxsus sənədlərlə sərhədi keçməyə cəhd edən 4 nəfər də saxlanılıb.

Sentyabrda sərhəd rejim qaydalarını pozduqlarına görə 578 nəfər barəsində inzibati tədbirlər görülüb.
Cinayətkarlığa qarşı mübarizə tədbirləri nəticəsində 334 nəfər axtarışda olan şəxs saxlanılaraq aidiyyəti orqanlara təhvil verilib. Bundan əlavə, 645 nəfərin ölkədən çıxışına, 59 nəfərin isə ölkəyə girişinə qoyulan qadağalar icra olunub.

Narkotik vasitələrin qanunsuz dövriyyəsinə qarşı görülən tədbirlər zamanı 685 kiloqram 575 qram narkotik maddə və 5960 ədəd psixotrop tərkibli həb aşkarlanaraq dövriyyədən çıxarılıb.

Qaçaqmalçılığa qarşı mübarizə nəticəsində isə ümumi dəyəri 8 milyon 629 min 755 manat olan dərman vasitələri, spirtli içki və tütün məmulatları ələ keçirilib.

DSX bildirir ki, dövlət sərhədinin mühafizəsi və ölkənin təhlükəsizliyinin təmin olunması istiqamətində tədbirlər davam etdirilir.