Dünən Misirdə 20-dən çox ölkə liderinin iştirakı ilə Yaxın Şərq Sülh Sammiti keçirilib. Tədbirdə bir sıra regional və beynəlxalq məsələlər, xüsusilə də Fələstin–İsrail münaqişəsi müzakirə olunub.

İsrailin Baş naziri Benyamin Netanyahu öncədən sammitdə iştirakını təsdiqləsə də, tədbirə bir neçə saat qalmış onun “yəhudi bayramı ilə əlaqədar” qatılmayacağı açıqlanıb.

Lakin “TRT Haber” telekanalının məlumatına görə, əsl səbəb fərqlidir — Netanyahu sammitə Türkiyə Prezidenti Rəcəb Tayyib Ərdoğanın etirazı nəticəsində qatılmayıb.

İddiaya əsasən, Ərdoğan Misirə səfəri ərəfəsində diplomatik kanallar vasitəsilə bir neçə ölkə ilə məsələni müzakirə edib və həmin ölkələr Türkiyənin mövqeyini dəstəkləyib. Nəticədə Netanyahunun tədbirdə iştirak etməyəcəyi barədə qərar qəbul olunub.

Bununla belə, İsrail hökuməti sözügedən iddialarla bağlı hələlik rəsmi açıqlama verməyib.