Nyu-Yorkda BMT Baş Assambleyası çərçivəsində ABŞ prezidenti Donald Tramp və Türkiyə prezidenti Rəcəb Tayyib Ərdoğanın iştirakı ilə Qəzza zolağındakı vəziyyətə həsr olunmuş yüksək səviyyəli toplantı keçirilib.

Görüşdə Misir, İndoneziya, İordaniya, Pakistan, Qətər, Səudiyyə Ərəbistanı və Birləşmiş Ərəb Əmirliklərinin liderləri də iştirak ediblər.

Məlumata görə, danışıqlar bağlı qapılar arxasında aparılıb. WAM-ın yaydığı xəbərə əsasən, müzakirələrdə müharibənin dayandırılması, daimi atəşkəsin əldə olunması, məhbusların azad edilməsi və humanitar böhranın həlli məsələləri diqqət mərkəzində olub.

Tramp toplantıda ərəb və müsəlman ölkələrinin hərbi qüvvələrinin Qəzzaya gətirilməsini, İsrail qoşunlarının çıxarılmasını təmin etməyi və bərpa proqramlarının maliyyələşdirilməsini nəzərdə tutan plan irəli sürüb. İsrail görüşdə iştirak etməyib, lakin planın detalları barədə baş nazir Benyamin Netanyahuya məlumat verilib. Sənəddə HƏMAS üçün hər hansı rol nəzərdə tutulmayıb, Fələstin Muxtariyyətinin iştirakı isə mümkün variant kimi dəyərləndirilib.

Toplantanı Türkiyə prezidenti Ərdoğan “çox məhsuldar və müsbət”, ABŞ prezidenti Tramp isə “çox uğurlu” adlandırıb.