Ermənistanın xarici işlər naziri Ararat Mirzoyan Türkiyə ilə diplomatik münasibətlərin qurulması və sərhədlərin açılmasının ölkəsi üçün böyük əhəmiyyət daşıdığını bildirib. O, həmçinin Azərbaycanın Ermənistanla sülh prosesinin institusionallaşdırılmasının vacibliyini vurğulayıb.

Mirzoyan qeyd edib ki, İrəvan hər iki istiqamətdə — həm Ankara, həm də Bakı ilə münasibətlərin normallaşması üçün səmimi və ardıcıl səylər göstərir. Onun sözlərinə görə, bu iki proses bir-birindən asılı deyil, lakin biri digərinə müsbət təsir göstərə bilər:

“Əgər bu iki komponent arasında səbəb-nəticə əlaqəsi qurmağa çalışsaq, görərik ki, Türkiyə ilə münasibətlərin tam normallaşması Ermənistan–Azərbaycan prosesinə mənfi deyil, əksinə müsbət təsir göstərə bilər.”

Nazir həmçinin nəqliyyat infrastrukturunun blokadasının aradan qaldırılması məsələsinə də toxunub. O xatırladıb ki, bu prosesin əsas prinsipləri avqustun 8-də Vaşinqtonda keçirilmiş sülh sammitində razılaşdırılıb:

ərazi bütövlüyü, sərhədlərin toxunulmazlığı, suverenlik, yurisdiksiya və qarşılıqlı hörmət.

Mirzoyanın sözlərinə görə, həmin çərçivədə müəyyən edilən TRIPP marşrutu həm Azərbaycanı Naxçıvanla, həm də Ermənistanı digər ölkələrlə birləşdirəcək, regionda yeni nəqliyyat əlaqələri yaradacaq:

“Ermənistan bunun mümkün qədər tez həyata keçirilməsi üçün maraq və fəal səylər göstərir.”

Ararat Mirzoyan çıxışında Ermənistanın həm Türkiyə, həm də Azərbaycanla münasibətlərin davamlı şəkildə normallaşmasında maraqlı olduğunu bir daha vurğulayıb.