Ermənistan Parlamentinin sədri Alen Simonyan Azərbaycana səfər etməyə hazır olduğunu açıqlayıb. O, bunu jurnalistlərə müsahibəsində deyib.

“Mən Azərbaycana doğru zamanda səfər etməyə hazıram”, – deyə Simonyan bildirib. O həmçinin azərbaycanlı həmkarını istənilən formatda Ermənistana dəvət etmək niyyətində olduğunu vurğulayıb.

Simonyan açıqlamasında Azərbaycanın 2026-cı ilin mayında Yerevanda keçiriləcək Avropa Siyasi Birliyi sammitində iştirakdan imtinasına da toxunub. Onun sözlərinə görə, bu qərarın Ermənistanla heç bir əlaqəsi yoxdur:

“Xanım Qafarova ilə görüşümüz zamanı Prezident adından məndən bunun Ermənistan tərəfi ilə heç bir əlaqəsi olmadığını çatdırmağımı xahiş etdi”.

Fon:
1980-ci illərin sonlarında gərginləşən Qarabağ münaqişəsi Azərbaycan və Ermənistan arasında silahlı toqquşmalara gətirib çıxarmışdı. 1990-cı illərdə Azərbaycanın Qarabağ bölgəsi və ətraf yeddi rayon işğal olunmuşdu. 2020-ci ildə 44 günlük müharibə və 2023-cü ildə birgünlük lokal antiterror tədbirləri nəticəsində Azərbaycan öz ərazilərində suverenliyini tam bərpa edib.

Bu il avqustun 8-də uzun illər münaqişə vəziyyətində olmuş iki ölkənin nümayəndələri Vaşinqtonda sülh müqaviləsinin mətnini paraflayıblar. ABŞ Prezidentinin iştirakı ilə tərəflər görüşün nəticələrinə dair bəyannamə də imzalayıb. Sənədə əsasən, Ermənistanın cənubundan keçəcək TRIPP marşrutu vasitəsilə Azərbaycanın əsas hissəsi ilə Naxçıvan arasında maneəsiz əlaqə təmin olunacaq. Marşrut Ermənistanın suverenliyi, ərazi bütövlüyü və yurisdiksiyası çərçivəsində fəaliyyət göstərəcək.