2026-cı il dövlət büdcəsində sosial istiqamətə ayrılan vəsaitlərin həcmi artacaq. Bu sahəyə 17,1 milyard manat ayrılması planlaşdırılır ki, bu da büdcə xərclərinin 41 faizindən çoxunu təşkil edir.

Bu barədə Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov məlumat verib.

Deputat bildirib ki, sosial artımlar qanunvericiliklə müəyyənləşdirilir və bu, Milli Məclisin səlahiyyətinə daxildir:

“Pensiya kapitalının indeksləşdirilərək artırılması ‘Əmək pensiyaları haqqında’ qanunla tənzimlənir. Ehtiyac meyarı, yaşayış minimumu da qanunla müəyyən edilir. ‘Veteran pulu’ da daxil olmaqla əlavə müavinətlərlə bağlı artım təklifləri var”.

Vüqar Bayramovun sözlərinə görə, müavinətlərin artırılması mexanizminin daha səmərəli olması üçün yeni yanaşma təklif edilir:

“Təkliflərdən biri budur ki, həmin məbləğlər kommunal, nəqliyyat və digər xərclərdəki artımlara bağlansın. Yəni bu sahələrdə qiymət artımı nə qədərdirsə, müavinətlər də ona uyğun indeksləşdirilsin. Gələcəkdə bu istiqamətlərdə yenidən artımlar olarsa, ilin sonunda pensiyalarda olduğu kimi uyğun müavinətlərin artırılması həyata keçirilə bilər”.

2026-cı ildə sosial müdafiə və sosial təminat xərclərinin artırılması ilə əhalinin həssas qruplarının daha yaxşı müdafiə olunacağı gözlənilir.