Xarici xüsusi xidmət orqanları ilə məxfi əməkdaşlıqda şübhəli bilinən Azərbaycan vətəndaşı ifşa edilərək saxlanılıb.

Dövlət Təhlükəsizliyi Xidmətinin Mətbuat Xidmətindən verilən məlumata görə, milli təhlükəsizliyə yönələn kəşfiyyat-pozuculuq fəaliyyətinin qarşısının alınması məqsədilə həyata keçirilən əməliyyat-istintaq tədbirləri zamanı 1969-cu il təvəllüdlü Fərzəliyev Siyafət Heydər oğlunun dövlətə xəyanət etməsinə əsaslı şübhələr müəyyən edilib.

Araşdırmalarla məlum olub ki, Naxçıvan Muxtar Respublikasının sakini olan Siyafət Fərzəliyev xarici ölkə ərazisində olarkən həmin dövlətin xüsusi xidmət orqanının nümayəndələri tərəfindən maddi maraq qarşılığında məxfi əməkdaşlığa cəlb edilib. O, Azərbaycana qayıtdıqdan sonra verilən tapşırıqlara əsasən Naxçıvan şəhəri və Şahbuz rayonu ərazisində yerləşən hərbi və digər strateji əhəmiyyətli obyektlərin videoçəkilişlərini apararaq xarici xüsusi xidmət orqanına ötürüb.

Bundan başqa, saxlanılan şəxsin yaşadığı ünvana baxış zamanı “Kalaşnikov” tipli avtomat silahının ayrı-ayrı hissələri aşkar edilərək götürülüb.

Siyafət Fərzəliyev Azərbaycan Respublikası Cinayət Məcəlləsinin 228.1-ci (qanunsuz olaraq odlu silah və onun hissələrinin saxlanılması) və 274-cü (dövlətə xəyanət) maddələri ilə təqsirləndirilərək məsuliyyətə cəlb olunub. Məhkəmənin qərarı ilə barəsində həbs qətimkan tədbiri seçilib.

Hazırda faktla bağlı istintaq-əməliyyat tədbirləri davam etdirilir.