Prezident İlham Əliyev dövlət qulluğunun hüquqi və sosial təminatının gücləndirilməsinə yönəlmiş bir sıra dəyişiklikləri təsdiqləyib. Dəyişikliklər Vergi Məcəlləsi, “Sosial sığorta haqqında” və “Dövlət qulluğu haqqında” qanunları əhatə edir.

Dəyişikliyə əsasən, “Dövlət qulluğu haqqında” qanunun dövlət qulluqçuları üçün nəzərdə tutulmuş təminatları tənzimləyən 33.2-ci maddəsi yeni redaksiyada verilib. Yeni redaksiyada dövlət qulluqçusunun pensiya yaşına çatmasına görə öz arzusu ilə və ya qulluqda olmanın son yaş həddinə çatması ilə əlaqədar qulluğa xitam verilməsi zamanı birdəfəlik haqqın ödənilməsi mexanizmləri təkmilləşdirilib.

Qanuna əlavə edilən yeni müddəalarla əvvəllər tənzimlənməyən bir sıra münasibətlər üzrə hüquqi əsaslar yaradılıb. Belə ki, dövlət qulluqçusunun:
• hərbi xidmətə çağırılması,
• vəfat etməsi,
• məhkəmə tərəfindən xəbərsiz itkin düşmüş hesab edilməsi və ya ölmüş elan olunması hallarında

onun vərəsələrinə müavinət ödənilməsi qaydaları müəyyən edilib. Eyni zamanda dövlət qulluqçusu müddətli həqiqi hərbi və ya alternativ xidmətə çağırıldıqda ona müavinət verilməsi, eləcə də orta aylıq dövlət məvacibinin məbləğinin müəyyənləşdirilməsi ilə bağlı məsələlər qanunvericilikdə əksini tapıb.

Bununla yanaşı, Vergi Məcəlləsinə edilən dəyişikliklər fiziki şəxslərin gəlir vergisindən azad olunmasını nəzərdə tutan müddəaların dəqiqləşdirilməsinə yönəlib. Bu dəyişikliklər dövlət qulluqçusunun pensiya yaşına çatmasına görə və ya yaş həddinə görə dövlət qulluğundan ayrılması hallarında tətbiq ediləcək.

“Sosial sığorta haqqında” qanuna edilən dəyişiklik isə məcburi dövlət sosial sığorta haqqı hesablanmayan gəlir növlərinin siyahısının dəqiqləşdirilməsi məqsədi daşıyır və eyni xarakterli tənzimləmələri əhatə edir.

Qəbul edilən dəyişikliklərin dövlət qulluqçularının sosial təminatının gücləndirilməsinə, hüquqi mexanizmlərin daha aydın və çevik olmasına xidmət etdiyi bildirilir.