Prezident İlham Əliyev Axar-Baxar və İlisu milli parkları haqqında əsasnamələrin təsdiq edilməsi ilə bağlı fərman imzalayıb.

Sənədə əsasən, hər iki milli parkın fəaliyyət istiqamətləri, idarəetmə qaydaları və mühafizə rejimi müəyyən edilib. Fərmandan irəli gələn məsələlərin həlli Nazirlər Kabinetinə və Ekologiya və Təbii Sərvətlər Nazirliyinə həvalə olunub.

Dövlət başçısı, həmçinin 18 yanvar 2016-cı il tarixli fərmanla təsdiq edilmiş “İnvestisiya təşviqi sənədinin verilməsi Qaydası”nda dəyişiklik edilməsi barədə yeni fərman imzalayıb.

Dəyişikliyə əsasən, sənaye məhəllələrinin rezidentləri tərəfindən investisiya təşviqi sənədi almaq üçün təqdim olunan strateji investisiya layihələrinin minimal dəyəri 1 milyon manat müəyyən edilib.

Bundan əlavə, Prezidentin müəyyən etdiyi istiqamətlər üzrə həyata keçirilən strateji investisiya layihələrini təqdim edən hüquqi şəxslərə və fərdi sahibkarlara investisiya təşviqi sənədi 2023-cü il yanvarın 1-dən etibarən 6 il müddətinə verilir.

Fərmandan irəli gələn məsələlərin icrası İqtisadiyyat Nazirliyinə tapşırılıb.