Azərbaycan Respublikasının Prezidentinin köməkçisi Anar Ələkbərov dövlət başçısına liseydə yaradılmış şərait barədə ətraflı məlumat verib.

Bildirilib ki, Avropa liseyinin əvvəlki binası 1937-ci ildə inşa olunub, 1987-ci ildə isə yenidən qurulub. Lakin ötən müddətdə bina istifadəyə yararsız vəziyyətə düşdüyündən, Heydər Əliyev Fondunun prezidenti Mehriban Əliyevanın tapşırığı ilə yeni lisey binası tikilib.

Üç və dördmərtəbəli 7 korpusdan ibarət olan, 1200 şagird yerlik bu təhsil müəssisəsi rayonun ən böyük məktəblərindən biridir. Lisey müasir mebel və avadanlıqlarla təmin olunub, fənn kabinetləri və laboratoriyalar əyani vəsaitlərlə təchiz edilib.

Təhsil müəssisəsində 50-dən çox sinif otağı, fizika, kimya və biologiya laboratoriyaları, informatika və STEAM otaqları, hərbi hazırlıq, tibb və əmək təlimi otaqları, kitabxana, yeməkxana, akt və idman zalları, həmçinin açıq idman meydançası yaradılıb.

Liseyin yeni binası Heydər Əliyev Fondunun həyata keçirdiyi “Yeniləşən Azərbaycana yeni məktəb” proqramı çərçivəsində inşa edilib. Qeyd edək ki, bu proqram çərçivəsində indiyədək ölkədə 500-dən çox məktəb istifadəyə verilib.

Ümumilikdə, Azərbaycanda təhsil sahəsinin inkişafı dövlət siyasətinin əsas prioritetlərindən biridir. Bu istiqamətdə həyata keçirilən layihələr, o cümlədən paytaxt Bakı və regionlarda tikilən yeni məktəblər şagirdlərin yüksək səviyyədə təhsil almalarına və biliklərini daha da inkişaf etdirmələrinə geniş imkanlar yaradır.