Moldova prezidenti Maya Sandu Müstəqil Dövlətlər Birliyinin (MDB) əsasını təşkil edən sazişlərin ləğvi ilə bağlı fərmanları imzalayıb. Bununla da ölkənin təşkilatdan çıxma prosesi rəsmi mərhələyə keçib.

Moldova Avropa İttifaqı standartlarına uyğunlaşma çərçivəsində indiyədək təxminən 70 MDB sazişini ləğv edib. Təşkilatdan çıxma prosesinin başladığını yanvar ayında ölkənin xarici işlər naziri Mixail Popşoy elan etmişdi.

Sazişlərin ləğvi təşəbbüsü Moldova Xarici İşlər Nazirliyi tərəfindən irəli sürülüb. Nazirlik bildirib ki, MDB-nin fundamental dəyərləri və prinsipləri artıq yerinə yetirilmir və təşkilat öz mövcudluq məqsədini itirib.

Rəsmi Kişinyov MDB-dən çıxmaq üçün əsas arqument kimi Rusiya tərəfindən ərazi bütövlüyü və sərhədlərin toxunulmazlığı prinsipinin kobud şəkildə pozulmasını göstərir. Xüsusilə, Rusiyanın Ukraynaya qarşı genişmiqyaslı müharibəsi, Gürcüstana qarşı hərbi əməliyyatları və Moldovanın Dnestryanı bölgəsində rus qoşunlarının yerləşdirilməsi MDB prinsiplərinin pozulması kimi qiymətləndirilir.

Rəsmi dairələr Moldovanın MDB-dən çıxmasını ölkənin Avropa İttifaqına inteqrasiya kursunun tərkib hissəsi kimi dəyərləndirir. Qeyd olunur ki, təşkilatdan çıxmaq dövlət büdcəsinə ildə təxminən 3,1 milyon ley (150 min avrodan çox) qənaət etməyə imkan verəcək.

Moldova 2023-cü ildən etibarən MDB-nin bütün tədbirlərində iştirakını dayandırmışdı və bu addım təşkilatdan çıxışın qaçılmaz mərhələsi kimi qiymətləndirilir.