İlham Əliyev Azərbaycan Ağsaqqallar Şurasının IX Qurultayının iştirakçılarına müraciət ünvanlayıb.

Dövlət başçısı müraciətində ağsaqqallıq ənənəsinin Azərbaycan xalqının qədim mənəvi-əxlaqi dəyərlərinə söykəndiyini və milli irsin əsas dayaqlarından biri olduğunu vurğulayıb. Bildirilib ki, Kitabi-Dədə Qorqud dastanında da ağsaqqal sözünə ehtiram yüksək əxlaqi keyfiyyət kimi təqdim olunur.

Prezident qeyd edib ki, ağsaqqallar cəmiyyətdə mənəvi dəyərlərin qorunması, nəsillərarası varisliyin təmin olunması, milli dövlətçilik ənənələrinin davam etdirilməsi və vətəndaş həmrəyliyinin gücləndirilməsində mühüm rol oynayırlar.

Müraciətdə həmçinin vurğulanıb ki, gənclərin vətənpərvərlik ruhunda tərbiyəsində ağsaqqalların rolu böyükdür və bu amil Vətən müharibəsində qazanılan Zəfərdə də özünü göstərib.

Dövlət başçısı əlavə edib ki, qloballaşma və sosial şəbəkələrin təsiri fonunda milli-mənəvi dəyərlərin qorunması daha da aktuallaşıb və bu baxımdan ağsaqqallıq institutunun əhəmiyyəti artır.

Sonda Prezident qurultayın işinə uğurlar arzulayıb, qəbul olunacaq qərarların Azərbaycan Ağsaqqallar Şurasının fəaliyyətinin daha da gücləndirilməsinə töhfə verəcəyinə inamını ifadə edib.