Azərbaycanın xarici işlər naziri Ceyhun Bayramov Ukrayna Prezidentinin Azərbaycana səfəri çərçivəsində Qəbələdə ukraynalı həmkarı Andrii Sybiha ilə görüş keçirib.

Bu barədə Azərbaycan Xarici İşlər Nazirliyi məlumat yayıb.

Görüş zamanı tərəflər ikitərəfli münasibətlərin möhkəmləndirilməsi perspektivlərini müzakirə edib, siyasi, iqtisadi, enerji və humanitar sahələrdə əməkdaşlığın genişləndirilməsinin əhəmiyyətini vurğulayıblar.

Nazirlər həmçinin ticarət, kommunikasiya və beynəlxalq təşkilatlar çərçivəsində əməkdaşlığın inkişafı məsələlərinə dair fikir mübadiləsi aparıblar.

Görüşdə regional və qlobal proseslər də müzakirə olunub, tərəflər suverenlik və ərazi bütövlüyünə qarşılıqlı dəstəyi bir daha təsdiqləyiblər.

Səfər çərçivəsində Azərbaycan və Ukrayna arasında “Mülki və Kommersiya İşləri üzrə Hüquqi Yardım haqqında Saziş” də imzalanıb. Sənəd iki ölkə arasında hüquqi əməkdaşlığın möhkəmləndirilməsinə xidmət edəcək.