ABŞ dövlət katibi Marko Rubio bildirib ki, TRIPP layihəsinin həyata keçirilməsi Azərbaycan və Ermənistan üçün mühüm iqtisadi və nəqliyyat perspektivləri açacaq.

Xarici KİV-in məlumatına görə, Rubio bu barədə Konqresin Nümayəndələr Palatasının Xarici İşlər Komitəsində çıxışı zamanı danışıb.

Dövlət katibi qeyd edib ki, son 16-17 ay ərzində ABŞ Dövlət Departamentinin fəaliyyəti həm mühüm diplomatik uğurlarla, həm də mürəkkəb beynəlxalq çağırışlarla müşayiət olunub.

Rubionun sözlərinə görə, Azərbaycan və Ermənistan arasında uzun illər davam edən qarşıdurmanın başa çatması regionda yeni əməkdaşlıq imkanları yaradıb. O bildirib ki, bu proses iki ölkə arasında yeni iqtisadi və nəqliyyat əlaqələrinin formalaşdırılmasını nəzərdə tutan TRIPP layihəsi üzrə memorandumun imzalanması ilə yekunlaşıb.

“Bu memorandum mənim tərəfimdən imzalanıb və o, Azərbaycanla Ermənistan üçün əhəmiyyətli iqtisadi və nəqliyyat imkanları formalaşdıracaq yeni rifah marşrutunun əsasını qoyur”, – deyə Rubio vurğulayıb.

ABŞ dövlət katibi hesab edir ki, layihə regionda iqtisadi inteqrasiyanın güclənməsinə, ticarət əlaqələrinin genişlənməsinə və nəqliyyat infrastrukturunun inkişafına töhfə verəcək.