Avropa Komissiyasının sədri Ursula von der Leyen ilə Ermənistanın Baş naziri Nikol Paşinyan arasında telefon danışığı baş tutub.

Xarici KİV-in məlumatına görə, tərəflər son vaxtlar Ermənistan və Rusiya arasında yaranmış iqtisadi məsələləri, eləcə də regiondakı vəziyyəti müzakirə ediblər.

Ursula fon der Leyen bildirib ki, Avropa İttifaqı Ermənistana dəstəyini davam etdirəcək və bunun üçün yeni yardım paketi hazırlanır. Onun sözlərinə görə, paket çərçivəsində Ermənistana 50 milyon avrodan çox təcili maliyyə yardımı ayrılması nəzərdə tutulur.

Avropa Komissiyasının sədri həmçinin Ermənistanın ixrac imkanlarının genişləndirilməsi istiqamətində addımlar atıldığını qeyd edib. O bildirib ki, yaxın günlərdə Latviyaya 10 min çiçək göndəriləcək və digər məhsul partiyalarının da Avropa bazarlarına çıxarılması planlaşdırılır.

Telefon danışığında regional nəqliyyat və ticarət əlaqələri də müzakirə olunub. Fon der Leyen Gürcüstan və Türkiyə üzərindən dəmir yolu bağlantılarının yenidən açılmasını mühüm irəliləyiş kimi qiymətləndirib.

Onun sözlərinə görə, Ermənistan Avropa, Cənubi Qafqaz və Orta Asiyanı birləşdirən strateji nəqliyyat və logistika mərkəzinə çevrilmək potensialına malikdir. Avropa İttifaqı regional kommunikasiyaların bərpası fonunda infrastruktur layihələrinin və sərhəd-keçid məntəqələrinin inkişafına dəstək verməyə hazır olduğunu bəyan edib.

Müşahidəçilər hesab edirlər ki, bu yardım paketi Aİ ilə Ermənistan arasında siyasi və iqtisadi əməkdaşlığın daha da dərinləşdiyini göstərən növbəti addım kimi qiymətləndirilə bilər.