Azərbaycan Prezidenti İlham Əliyev “Qlobal təhlükəsizliyə regional töhfə: Cənubi Qafqazda sülh quruculuğu” mövzusunda Şuşada keçirilən beynəlxalq konfransın iştirakçılarına müraciət edib.

Dövlət başçısı müraciətində konfransın artıq 2022-ci ildən etibarən ənənəvi olaraq keçirildiyini və müasir geosiyasi çağırışlar fonunda xüsusi əhəmiyyət daşıdığını bildirib. O qeyd edib ki, tədbirin iştirakçı sayının ilbəil artması onun beynəlxalq əməkdaşlığa və qlobal təhlükəsizliyə töhfə verən platformaya çevrildiyini göstərir.

Prezident vurğulayıb ki, Azərbaycan uzun illər işğal və ədalətsizliklə üzləşsə də, 44 günlük Vətən müharibəsi və 2023-cü ildə keçirilən antiterror əməliyyatı nəticəsində ərazi bütövlüyünü və suverenliyini tam bərpa edib. O, BMT Təhlükəsizlik Şurasının qətnamələrinin Azərbaycan tərəfindən yerinə yetirildiyini də diqqətə çatdırıb.

Müraciətdə Azərbaycan-Ermənistan sülh gündəliyinə də toxunulub, ötən il Vaşinqtonda ABŞ Prezidenti Donald Trampın şahidliyi ilə imzalanan Birgə Bəyannamənin və sülh sazişinin paraflanmasının regionda yeni mərhələ yaratdığı qeyd olunub.

Dövlət başçısı həmçinin Zəngəzur dəhlizinin regional nəqliyyat və Orta Dəhliz üçün mühüm əhəmiyyət daşıdığını bildirib, Azərbaycanın postmünaqişə dövründə həyata keçirdiyi bərpa və şəhərsalma layihələrindən danışıb.

Sonda Prezident İlham Əliyev konfransın region ölkələri arasında əməkdaşlığın və etimadın möhkəmlənməsinə töhfə verəcəyinə inamını ifadə edib, iştirakçılara uğurlar arzulayıb.