30 ildən bəri İran Azərbaycanı zəif bir ölkə kimi qəbul edib. Lakin İkinci Qarabağ müharibəsində rəsmi Bakının qələbəsi hesabı dəyişdi və bu səbəbdən İran Azərbaycana və ona dəstək verən Türkiyəyə qəzəblənib.

Bunu Azerforum.com-a ekspert Məhəmməd Pervez Bilgrami (Hindistan) bildirib.

Onun sözlərinə görə, bunun ardınca Türkiyə, Azərbaycan və Pakistan hərbçilərinin 2021-ci il sentyabrın 20-də Bakıda birgə ilk təlimlərə başlaması rəsmi Tehranın qəzəbini daha da artırıb: “Özü də təlimlərin adı "Üç qardaş -2021" idi. Birgə təlimlərin əsas məqsədi Türkiyə, Azərbaycan və Pakistanın Xəzər dənizi bölgəsində sülhün, sabitliyin inkişafı idi ki, bu da İranın geosiyasi maraqlarına ziddir.

İran buna kəskin tənqidlə reaksiya verdi və bunun guya regional sabitliyə təhlükə yaradacağını iddia etdi. Buna cavab olaraq, İran sentyabrın 28 -də Azərbaycan sərhədində öz hərbi təlimini keçirdi. İndi İran Əfqanıstanın gələcəkdə "Üç Qardaş" a qoşula biləcəyindən narahatdır. Axı Əfqanıstanın hər üç ölkə ilə münasibətləri yaxşıdır”.