“İranın yeni prezidenti seçildikdən sonra 3 xarici səfərin hamısı qonşu ölkələrə edilib. Cənab Rəisinin Aşabad səfəri çox mühüm olub ki, burada da o, cənab İlham Əliyevlə görüşüb və faydalı danışıqlar aparılıb. Bu görüş iki ölkə arasındakı münasibətlərdə dönüş nöqtəsi hesab olunur".

Bunu İranın Azərbaycandakı səfiri Seyid Abbas Musəvi İranda İslam İnqilabının qələbəsinin 43-cü və iki ölkə arasında diplomatik əlaqələrin qurulmasının 30-cu ildönümü münasibətilə bu gün keçirdiyi mətbuat konfransında deyib.

Səfir deyib ki, həmin görüşdən sonra iki ölkənin əlaqələrində sıçrayışlı inkişaf müşahidə edilir: "Bu inkişaf siyasi, iqtisadi, mədəni və təhlükəsizlik sahələrində özünü göstərir. İki ölkə beynəlxalq təşkilatlarda səmərəli əməkdaşlıq edir və bir-birlərinin mövqelərini dəstəkləyir. Ümidvaram ki, əlaqələrin inkişafı bu səviyyədə davam edəcək və üçüncü tərəflər bu əlaqələrin inkişafına heç bir təsir edə bilməyəcək”.