Xaçmaz Rayon Mərkəzi Xəstəxanasında (XRMX) liftin uzun müddətdir işləməməsi vətəndaşların narazılığına səbəb olub. Bu barədə redaksiyamıza müraciət edən sakinlərdən biri xəstəxanada qarşılaşdığı acınacaqlı vəziyyəti bölüşüb.

Vətəndaş bildirir ki, iyunun 5-də insult keçirən ağır vəziyyətdə olan bir xəstəni Xaçmaz Rayon Mərkəzi Xəstəxanasına gətiriblər. Həkimlər tərəfindən xəstənin reanimasiya şöbəsinə — yəni xəstəxananın üçüncü mərtəbəsinə yerləşdirilməsi tələb olunub. Lakin məlum olub ki, lift işlək vəziyyətdə deyil.

“Xəstə yaxın qohumumdur. Ağır insult keçirdiyindən bədənini hərəkət etdirmək olmazdı. Ancaq lift işləmədiyindən xəstəni xərəkdə, pilləkənlərlə üçüncü mərtəbəyə qaldırmağa məcbur olduq. Bu həm xəstə, həm də bizlər üçün çox təhlükəli və çətin oldu,” – deyə şikayətçi bildirib.

Vətəndaş əlavə edir ki, sözügedən problemin iki ilə yaxındır davam etməsinə baxmayaraq, məsul şəxslər heç bir tədbir görmür:

“Artıq iki ildir XRMX-da lift işləmir. Niyə? Səbəb nədir? Bərpası mümkünsüzdürmü, yoxsa məsuliyyətsizlikdir? Xəstəxananın direktoru, baş həkimi bu vəziyyətdən xəbərsizdirmi, ya laqeyid yanaşırlar? Cənab Prezidentin səhiyyə sahəsinə ayırdığı vəsait hara gedir?”

Hazırda vətəndaşlar məsələ ilə bağlı rəsmi açıqlama və liftin nə vaxt bərpa olunacağına dair cavab gözləyirlər.

Qarşı tərəfin mövqeyini işıqlandırmağa hazırıq. Xaçmaz Rayon Mərkəzi Xəstəxanasının rəhbərliyindən məsələ ilə bağlı münasibət öyrənməyə çalışırıq.