Gürcüstanda müxalifətə qarşı təzyiqlər davam edir. Bu gün daha bir müxalifət lideri – “Dəyişiklik üçün Koalisiya”nın təmsilçisi Nika Qvaramia həbs olunub. Bu, son üç həftə ərzində həbs olunan üçüncü müxalifət lideridir.

Nika Qvaramia iyunun 13-də Rustavi məhkəməsinin qarşısında saxlanılıb. Ona qarşı parlamentin istintaq komissiyası qarşısında ifadə verməkdən imtina etdiyinə görə cinayət işi açılmışdı, lakin ilkin mərhələdə məhkəmə onun girov müqabilində azad qalmasına imkan vermişdi.

Qvaramia 30,000 lari (təxminən 18,750 AZN) məbləğindəki girovu ödəməkdən imtina etdiyinə görə, azadlıqda qalma müddəti iyunun 13-də başa çatdığından barəsində həbs qətimkan tədbiri seçilib.

Daha əvvəl Zurab Caparidze və Nika Meliya da eyni səbəbdən həbs olunmuşdu.

Qvaramia həbsi öncəsi “Facebook” səhifəsində bunları yazıb: “Əgər bunun üçün həbsdə olmaqla bədəl ödəməliyəmsə, yaxşı, o zaman bu bədəli ödəyəcəyəm. Vicdanım qarşısında və Gürcüstan qarşısında haqlı olduğuma əminəm. Əgər ölkəmizi xilas edə bilməsək, bu, tarixdə qara səhifə olacaq.”

Qeyd edək ki, istintaq komissiyası hökumət tərəfdən yaradılıb və deputat Tea Tsulukianinin rəhbərliyi ilə fəaliyyət göstərir. Komissiyanın məqsədi isə keçmiş hakim partiya – Birləşmiş Milli Hərəkatın (UNM) mümkün qanun pozuntularını araşdırmaqdır.