ABŞ-da 22 ştatın qubernatoru birgə bəyanat yayaraq keçmiş prezident Donald Trampın Los-Ancelesdə baş verən etiraz aksiyalarını yatırmaq məqsədilə Milli Qvardiyanı şəhərə göndərməsini kəskin tənqid ediblər.

Demokrat Partiyasından olan qubernatorlar Trampı səlahiyyətlərindən sui-istifadə etməkdə ittiham ediblər. Onların sözlərinə görə, Kaliforniya ştatının hökumətindən razılıq alınmadan belə bir addımın atılması “həyəcanverici presedent”dir və ölkə daxilində təhlükəsizlik balansına ciddi təhdid yaradır.

Qubernatorlar bildiriblər ki, bu, 1965-ci ildən bəri ilk dəfədir ki, ABŞ prezidenti ştat rəhbərinin müraciəti olmadan Milli Qvardiya əsgərlərindən daxili müdaxilə üçün istifadə edir.

Bəyanatda vurğulanıb ki, Los-Ancelesdəki vəziyyət federal hökumətin bu səviyyədə müdaxiləsini tələb etmir və Trampın addımları “ocağa benzin tökməkdən” başqa bir şey deyil.

Kaliforniya ştatının qubernatoru Qavin Nyusom da məsələ ilə bağlı sərt mövqe sərgiləyib. O, Pentaqona rəsmi məktubla müraciət edərək Milli Qvardiya əsgərlərinin təcili şəkildə ştatdan çıxarılmasını tələb edib:

“Biz bura əsgər göndərilməsini xahiş etməmişik. Bu, ştatın suverenliyinin pozulmasıdır və gərginliyi daha da artırır,” – deyə Nyusom qeyd edib.

Qubernator sosial media hesablarında da Trampı tənqid edərək bildirib ki, onun müdaxiləsinədək ştatda ciddi bir problem yaşanmırdı.