İraqın şərqində yerləşən Əl-Kut şəhərindəki ticarət mərkəzində baş vermiş güclü yanğın nəticəsində azı 63 nəfər həyatını itirib. Bu barədə “Reuters” agentliyi yerli hakimiyyət orqanlarına istinadla məlumat yayıb.

Məlumata görə, beşmərtəbəli binada yerləşən hipermarketi əhatə edən yanğın qısa müddətdə genişlənərək bütün ticarət mərkəzini bürüyüb.

Əl-Kut şəhər səhiyyə idarəsinin nümayəndəsinin açıqlamasına əsasən, həyatını itirən 63 nəfərdən 59-nun şəxsiyyəti müəyyən edilib. Lakin bir nəfərin kimliyi hələlik müəyyənləşdirilə bilməyib. Qurumun məlumatına görə, dağıntılar altında hələ də başqa cəsədlərin qaldığı ehtimal edilir.

Yanğının səbəbləri barədə rəsmi açıqlama verilməsə də, hadisə ilə bağlı istintaq başladılıb. Axtarış-xilasetmə və yanğınsöndürmə işləri hazırda da davam etdirilir.

Qeyd edək ki, Əl-Kut şəhəri paytaxt Bağdaddan təxminən 160 kilometr cənub-şərqdə yerləşir. Hadisə ölkədə geniş rezonansa səbəb olub və hökumət tərəfindən fövqəladə tədbirlərin görülməsi tələb olunur.