Xaçmaz rayonunun Padar kəndində dünyasını dəyişmiş atası Qələmşah Nuriyevin ehsanı münasibətilə iş adamı Tofiq Nuriyev şəxsi vəsaiti hesabına kənd yolunu asfalt etdirib. Tofiq Nuriyevin bu addımı yerli sakinlər tərəfindən nümunəvi və xeyirxah təşəbbüs kimi qiymətləndirilib.

Kəndin 1 kilometrlik daşlı yolu “Ana yol” MMC tərəfindən tam asfaltlanıb. Təxminən 160 min manata başa gələn bu təşəbbüs nəticəsində Padar kəndində yaşayan 867 nəfərin gündəlik gediş-gəliş problemi həll olunub.

Hazırda xaricdə sahibkarlıq fəaliyyəti ilə məşğul olan Tofiq Nuriyev bildirib ki, bu addımı atası Qələmşah Nuriyevin xatirəsinə ehtiram əlaməti olaraq atıb:

“Atam bu kəndin çörəyini yeyib, suyunu içib. Onun ruhuna ehsan vermək istəyərkən, düşündüm ki, bu, həm də yaşayanlara xidmət etməlidir.”

Yolun asfaltlanması kənddə yaşayan sakinlər üçün əmək, təhsil və səhiyyə xidmətlərinə çıxışı asanlaşdırıb. Yerli icra nümayəndələri də təşəbbüsü müsbət dəyərləndirib və bu cür şəxsi təşəbbüslərin ictimai əhəmiyyətini vurğulayıblar.