Bakı, 7 avqust 2025 – Bakı Apellyasiya Məhkəməsi həbsdə olan jurnalist, Meydan TV-nin baş redaktoru Aynur Elgünəşin (Qənbərova) iti Maksla görüşmək tələbilə verdiyi apellyasiya şikayətini təmin etməyib. Məhkəmə Xətai Rayon Məhkəməsinin əvvəlki qərarını qüvvədə saxlayıb.

Proses hakim Zamin İbrahimovun sədrliyi ilə baş tutub.

Aynur Elgünəş bir neçə dəfə Penitensiar Xidmətin rəhbərliyinə müraciət edərək iti ilə görüşmək üçün icazə istəyib. Lakin cavab ala bilmədiyi üçün məsələni məhkəməyə çıxarıb.

“Mənim Maksla görüşməyimi qadağan edən heç bir qanun yoxdur. Bu, şəxsi həyat və heyvan haqları baxımından vacib məsələdir. Görüşümüz nə təhlükəli, nə də narahatlıq doğuran bir haldır. Qadağa mənə mənəvi əzab və psixoloji gərginlik yaşadır,” – deyə jurnalist müraciətində bildirmişdi.

Jurnalistin bu tələbi həm hüquqşünaslar, həm də heyvan hüquqları fəalları tərəfindən diqqətlə izlənir.

“Meydan TV işi” üzrə saxlanmalar davam edir
Aynur Elgünəş 2024-cü il dekabrın 6-da “Meydan TV işi” çərçivəsində saxlanılıb. Onunla birlikdə saytın Azərbaycan komandasında çalışan jurnalistlər – Ramin Deko, Aysel Umudova, Aytac Tapdıq, Xəyalə Ağayeva və Natiq Cavadlı da həbs olunub.

Daha sonra bu iş üzrə “Arqument.az” saytının baş redaktoru Şəmşad Ağayev (Ağa), jurnalistlər Nurlan Libre (Qəhrəmanlı) və Fatimə Mövlamlı da saxlanılıb.

2025-ci il mayın 7-də isə müstəqil jurnalist Ülviyyə Əli eyni iş üzrə saxlanılıb və ona qarşı qaçaqmalçılıq maddəsi ilə ittiham irəli sürülüb.

Saxlanılan jurnalistlərin heç biri özünü təqsirli bilmir. Onlar həbsin peşə fəaliyyətləri ilə bağlı olduğunu bildirirlər.