Prezident İlham Əliyevin tapşırığına uyğun olaraq, Ağdərə rayonunun Kolatağ kəndinə ilk köç karvanı yola salınıb. Köçürülən ailələr uzun illərdir Respublikanın müxtəlif bölgələrində – əsasən yataqxanalarda, sanatoriya və inzibati binalarda müvəqqəti məskunlaşmış məcburi köçkünlərdir.

İlk mərhələdə Kolatağa 26 ailə, yəni 89 nəfər köçürülüb. Bu qayıdış, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun əldə etdiyi tarixi Zəfərin nəticəsində, məcburi köçkünlərin 30 ildən sonra könüllü, təhlükəsiz və ləyaqətlə doğma yurdlarına qayıtması üçün yaradılan şəraitin bir göstəricisidir.

Doğma yurda qayıdan sakinlər dövlətin hərtərəfli qayğısı ilə əhatə olunduqlarını vurğulayaraq Prezident İlham Əliyevə və Birinci vitse-prezident Mehriban Əliyevaya təşəkkürlərini bildiriblər. Onlar həmçinin torpaqların azad olunmasında misilsiz qəhrəmanlıq göstərən Azərbaycan Ordusuna, əsgər və zabitlərə minnətdarlıqlarını çatdırıb, şəhidlərin xatirəsini ehtiramla yad edərək ailələrinə səbir diləyiblər.

Bu köç prosesi mərhələlərlə davam etdiriləcək.