Bakı–Quba–Rusiya Federasiyası ilə dövlət sərhədini birləşdirən yeni ödənişli avtomobil yolunda radar və müşahidə kameralarının quraşdırılması işlərinə başlanılıb. Yolun bütün uzunluğu boyunca maksimal sürət həddi, radarlar və müşahidə kameraları barədə məlumat verən yol nişanları isə yanvar ayında quraşdırılmışdı.

Azərbaycan Avtomobil Yolları Dövlət Agentliyinin (AAYDA) 20 nömrəli Xüsusi Təyinatlı Yol İstismarı MMC-nin direktoru Mirqiyas Kazımovun sözlərinə görə, yeni texniki vasitələrin quraşdırılmasına ötən həftədən start verilib və hazırda sistemlər test rejimində fəaliyyət göstərir.

Onun bildirdiyinə görə, ödənişli yolun 129 kilometrlik hissəsində 20-yə yaxın məntəqədə radar və xüsusi texniki vasitələrin quraşdırılması nəzərdə tutulur. Bu proses Daxili İşlər Nazirliyinin müvafiq qurumu tərəfindən həyata keçirilir və işlərin bir ay ərzində yekunlaşdırılması planlaşdırılır.

AAYDA rəsmisi əlavə edib ki, hazırda ödənişli yolda sürət həddinin artırılması ilə bağlı təkliflər də müzakirə olunur. Mövcud qanunvericiliyə əsasən, yolun bu hissəsində maksimal sürət həddi 110 km/saat təşkil edir. Yeni Yaşma ödəmə məntəqəsindən başlayaraq Yeni Sudur ödəmə məntəqəsinədək olan marşrut boyunca sürət həddini göstərən nişanlar quraşdırılıb.