USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Avropa Məhkəməsi FETÖ ittihamı ilə mühakimə olunan şəxslərin hüquqlarının pozulduğunu tanıyıb
Avropa İnsan Hüquqları Məhkəməsi (AİHM) Türkiyədə FETÖ-yə üzv olmaq ittihamı ilə mühakimə edilmiş daha 2 420 nəfərin Türkiyəyə qarşı şikayətinə baxıb.
Dekabrın 16-da dərc olunan qərarda məhkəmə bu şəxslərin işlərində Avropa İnsan Hüquqları Konvensiyasının pozulduğunu müəyyən edib.
Ərizəçilər Türkiyə hakimiyyəti tərəfindən “Fətullahçı Terror Təşkilatı” (FETÖ) kimi tanınan quruma üzv olmaq ittihamı ilə həbs olunublar. Həmin həbslər 2016-cı il iyulun 15-də baş verdiyi bildirilən hərbi çevriliş cəhdindən sonra həyata keçirilib.
Türkiyə hüquq-mühafizə orqanları saxlanılan şəxslərin “ByLock” adlı şifrəli mesajlaşma tətbiqindən istifadə etdiklərini əsas götürərək, bu tətbiqin yalnız FETÖ üzvləri üçün nəzərdə tutulduğunu iddia edib. Yerli məhkəmələr də “ByLock”dan istifadənin terror təşkilatına üzvlük ittihamı ilə azadlıqdan məhrumetmə üçün kifayət qədər sübut olduğuna qərar verib.
AİHM qərarında xatırladıb ki, əvvəllər baxdığı oxşar işlərdə “ByLock” istifadəçiliyi faktına əsaslanan bu cür yanaşmanın Avropa İnsan Hüquqları Konvensiyasının 7-ci maddəsi ilə təmin edilən qanunilik prinsipini pozduğunu artıq tanıyıb.
Nəticə etibarilə məhkəmə Konvensiyanın 6.1-ci maddəsinin (ədalətli məhkəmə araşdırması hüququ) və 7-ci maddəsinin (qanunda nəzərdə tutulmayan cəzanın yolverilməzliyi) pozulduğunu müəyyən edib.
Bununla belə, AİHM Türkiyə hökumətini ərizəçilərə təzminat ödəməyə məcbur etməyib. Məhkəmə qeyd edib ki, Türkiyə qanunvericiliyinə əsasən, ərizəçilər AİHM qərarından sonra yerli məhkəmələrdə işlərinə yenidən baxılması üçün müraciət edə bilərlər.
Qeyd edək ki, AİHM indiyədək Türkiyəyə qarşı bu məzmunlu işlər üzrə ümumilikdə 6 884 nəfərin şikayətinə baxıb.
