Sabiq deputat, Qafqaz Müsəlmanları İdarəsinin sədri Allahşükür Paşazadənin qudası Qalib Salahzadə 23 yaşlı nəvəsi Həsən Salahzadənin paytaxtın Xəzər rayonu, Bilgəh qəsəbəsində iri biznes obyekti açması ilə bağlı yayılan iddialara münasibət bildirib.

Qalib Salahzadə Pravda.az-a açıqlamasında yayılan məlumatların həqiqətə uyğun olmadığını deyib. Onun sözlərinə görə, Bilgəh ərazisində olan obyektlərin hamısı şəxsən özünə məxsusdur və nəvəsinin həmin ərazi ilə heç bir əlaqəsi yoxdur:

“Bilgəhdə nə qədər desəniz, obyektim var. 23 yaşında nə obyekt açmaq? Həsən şəhərdə yaşayır, Bilgəhdə nə işi var? Bilgəhdəki obyektlərin hamısını mən açmışam. Qohumlarımın adına salınması başqa məsələdir. Həsənin adına heç eşşək də yoxdur”, – deyə Q.Salahzadə bildirib.

O vurğulayıb ki, nəvələrini məqsədli şəkildə kənd mühitindən uzaqlaşdıraraq şəhərdə təhsil almalarına və inkişaf etmələrinə şərait yaradıb:
“Nəvələrimi oxutdururam. Həsən ABŞ-də təhsil alıb, çox savadlıdır. Amma onun hansı işlə məşğul olduğunu belə dəqiq bilmirəm. Sadəcə ciddi işlərlə məşğul olduğunu bilirəm”.

Qalib Salahzadə bəzi iddiaların məqsədli şəkildə yayıldığını deyərək, Şeyx Allahşükür Paşazadənin nəvəsinə biznes qurmaqda kömək etməsi ilə bağlı deyilənləri də təkzib edib:
“Şeyxin öz övladları var. Məgər mən ölmüşəm ki, icazə verəm, nəvələrim kiməsə ağız açsınlar? 73 yaşım var, hələ uzun illər planımda ölmək yoxdur”.

O, həmçinin ötən ay Allahşükür Paşazadənin qızı Xatirə Salahzadənin Bilgəhdə obyekt açması ilə bağlı yayılan məlumatlara da toxunub və bildirib ki, bu iddialar da əsassızdır:
“Əliabbas Salahzadənin xanımı heç vaxt heç bir işə qarışmayıb, heç nədən xəbəri yoxdur”.

Qalib Salahzadə əlavə edib ki, onun barəsində və ailə üzvləri ilə bağlı yayılan məlumatlar sensasiya xarakteri daşıyır və reallığı əks etdirmir.