Ukrayna Prezidenti Volodimir Zelenski Yeni il müraciətində müharibə, sülh danışıqları və Qərbin rolu ilə bağlı əsas mövqelərini açıqlayıb. Prezident bildirib ki, mümkün sülh sazişi artıq 90 faiz hazırdır, lakin həlledici olan son 10 faiz məhz Ukraynanın təhlükəsizliyi ilə bağlı məsələlərdir.

Zelenskinin sözlərinə görə, Ukrayna müharibənin bitməsini istəyir, amma bu, ölkənin mövcudluğu bahasına başa gələ bilməz. “Biz müharibənin bitməsini istəyirik, amma Ukraynanın bitməsini yox”, – deyə o vurğulayıb və yorğunluğun təslim olmaq anlamına gəlmədiyini qeyd edib.

Prezident Donbasdan çıxmaq çağırışlarını “aldadıcı təklif” adlandıraraq, keçmiş təcrübələrə istinad edib. Onun sözlərinə görə, Budapeşt Memorandumu və Minsk razılaşmaları kimi zəif və icrasız mexanizmlər Ukrayna üçün qəbuledilməzdir. Zelenski bildirib ki, təhlükəsizlik zəmanətləri yalnız siyasi bəyanatlarla deyil, ABŞ Konqresi, Avropa parlamentləri və tərəfdaş ölkələr tərəfindən ratifikasiya olunmuş hüquqi öhdəliklərlə təmin edilməlidir.

Zelenski çıxışında ABŞ-la münasibətlərə də toxunub. O qeyd edib ki, Vaşinqtonla dialoq asan olmayıb, lakin aparılan danışıqlar “Ukraynasız heç nəyin mümkün olmadığını” göstərib. Prezidentin sözlərinə görə, ABŞ Rusiyanı tez və qətiyyətlə dayandıra biləcək gücə malikdir və bu, istənilən vaxt mümkündür.

Sanksiyalar məsələsinə toxunan Zelenski Rusiyaya qarşı məhdudiyyətlərə görə təşəkkür etsə də, onların yetərli olmadığını bildirib. Onun fikrincə, Rusiyanın neft daşımalarının və hərbi sənaye potensialının tam dayanması müharibənin bitməsi üçün əsas şərtdir.

Prezident Qərb silahlarının, o cümlədən “Tomahawk” raketlərinin Ukraynaya verilməsinin yalnız bir mesaj verəcəyini deyib: müharibənin alternativi yoxdur və sülh labüddür. O, həmçinin Putinin Avropaya verdiyi “hücum etməyəcəyik” vədlərini təhlükəli siqnal kimi dəyərləndirib.

Zelenski bildirib ki, Ukrayna hazırda Avropanı “rus dünyasından” ayıran yeganə qalxandır. Onun sözlərinə görə, indiyədək alınan 100 milyard dollarlıq beynəlxalq dəstək təkcə hərbi ehtiyaclara deyil, ölkə daxilində maaşların, pensiyaların və sosial sabitliyin qorunmasına xidmət edib.

Çıxışının sonunda Zelenski Ukraynanın Avropa üçün, Avropanın isə Ukrayna üçün vacib olduğunu vurğulayıb və Ukrayna xalqının prezidenti olmaqdan qürur duyduğunu bildirib.