Dünya Bankı 2025-cü ilin Global Findex hesabatını açıqlayıb. Hesabatın məqsədi ölkələr üzrə əhalinin maliyyə və rəqəmsal xidmətlərə çıxış səviyyəsini və bu xidmətlərdən istifadə davranışını ölçmək və müqayisə etməkdir. Hesabat 2024-cü ildə 141 ölkədə aparılmış sorğulara əsaslanır. Hər ölkə üzrə təxminən 1000 respondent iştirak edib. Azərbaycanda da müxtəlif ərazilərdə (Şərqi Zəngəzur və Naxçıvan əraziləri xaric) 1000 nəfər arasında üzbəüz sorğu aparılıb.

Hesabata əsasən, Azərbaycanda rəyi soruşulanların 56%-i bank hesablarını olduğunu qeyd edib. Halbuki qonşu Gürcüstan və Ermənistanda analoji göstərici uyğun olaraq 79% və 71%-ə bərabərdir.

Sorğudan məlum olur ki, Azərbaycanda sorğu iştirakçılarının 17%-i vəsaitlərini banklarda saxlayır, 22%-i isə banklardan kredit götürür. Gürcüstanda respondentlərin 19%-i pulunu banklara etibar etdiyini, 24%-i banklardan borc aldığını bildirib. Ermənistanda bu göstərici müvafiq olaraq 11% və 23%-dir.

Mobil telefonlara sahibliyə gəlincə, bu göstərici Azərbaycanda 90% olduğu halda qonşu ölkələrin hər birində 95%-ə bərabər olub. Son 3 ayda internet istifadəsinə gəlincə, Azərbaycan (86%) Gürcüstanı (82%) üstələyir, Ermənistandan (88%) isə geri qalır.

Hesabatda diqqəti çəkən digər məqam mobil telefon sahiblərini gender bölgüsüdür. Sorğu nəticələri göstərir ki, Azərbaycan və Ermənistandan fərqli olaraq Gürcüstanda mobil telefon sahibləri olan qadınlar kişiləri üstələyir.