Azərbaycanda elektron siqaretlərin və onların komponentlərinin idxalı, ixracı, istehsalı, saxlanılması, satışı və istifadəsi qadağan olunub. Bununla bağlı Prezident İlham Əliyev “Tütün və tütün məmulatı haqqında” qanuna edilən dəyişiklikləri təsdiqləyib.

Qanuna əsasən, nikotin tərkibli elektron siqaretlər tütün məmulatı anlayışına daxil edilir. Sənəddə elektron siqaretlərin nikotin tərkibli və ya nikotinsiz buxarın tənəffüs yolu ilə insan orqanizminə daxil olması üçün nəzərdə tutulmuş, müştük, kartric, flakon və digər komponentləri olan və ya olmayan cihaz və məhsullar olduğu qeyd edilib. Elektron siqaretlər birdəfəlik istifadə üçün və ya təkrar doldurulan formada ola bilər.

Qanunda vurğulanıb ki, qızdırılan tütün məmulatları elektron siqaret hesab edilmir. Qızdırılan tütün məmulatı alışdırılmadan və tüstü əmələ gəlmədən qızdırılma prosesi nəticəsində yaranan nikotin tərkibli aerozolun tənəffüsü üçün nəzərdə tutulmuş məhsul kimi müəyyənləşdirilib.

Dəyişikliklərin məqsədi tütün məmulatları, qızdırılan tütün məmulatları və elektron siqaretlər arasında hüquqi fərqləndirmənin daha dəqiq aparılmasıdır. Bu, hüquq tətbiqetmədə aydınlığın təmin olunmasına imkan verəcək.

Eyni zamanda uyğunlaşdırma çərçivəsində Vergi Məcəlləsində və “Reklam haqqında” qanunda da dəyişikliklər edilib. Belə ki, birdəfəlik istifadə üçün elektron siqaretlər və elektron siqaretlər üçün mayelər aksizli mallar siyahısından çıxarılıb, bununla əlaqədar vergi dərəcələri ləğv edilib. Reklamla bağlı qadağalar isə yeni anlayışlara uyğunlaşdırılıb.

Qanun 2026-cı il aprelin 1-dən qüvvəyə minəcək.