Xırdalan şəhərinin mərkəzində nəqliyyat sıxlığının azaldılması məqsədilə yeni tunel layihəsinin icrasına başlanılması planlaşdırılır. Bu barədə Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev məlumat verib.

Onun sözlərinə görə, M-4 avtomobil yolu – Xırdalan (mərkəz) tuneli 2026-cı ildə tikintisinə başlanması mümkün olan prioritet layihələr siyahısına daxildir. Layihənin reallaşdırılması Xırdalan şəhəri və ətraf ərazilərdə avtomobil axınının daha səmərəli təşkilinə, mövcud tıxacların azaldılmasına və paytaxta giriş-çıxışın sürətlənməsinə xidmət edəcək.

Anar Rzayev qeyd edib ki, sözügedən tunel layihəsi Bakı və Abşeron yarımadasında nəqliyyat infrastrukturunun təkmilləşdirilməsi istiqamətində atılan ardıcıl addımların bir hissəsidir və bölgədə gündəlik hərəkətin rahatlaşdırılmasına mühüm töhfə verəcək.

AYNA sədri eyni zamanda 2026-cı ildə tikintisinə başlanması planlaşdırılan digər yol layihələri barədə də məlumat verib. Bildirilib ki, M. Xiyabani – Dairəvi-1 yolu, Xırdalan dairəsi, eləcə də Ə. Salamzadə – Z. Bünyadov istiqamətində yeni yol infrastrukturunun yaradılması nəzərdə tutulur.

Qeyd olunub ki, həyata keçirilən və planlaşdırılan bu layihələr Bakı və ətraf ərazilərdə nəqliyyat sıxlığının əhəmiyyətli dərəcədə azalmasına, hərəkətin təhlükəsizliyinin artırılmasına və sürücülər üçün vaxt itkisinın minimuma endirilməsinə xidmət edəcək.