Dövlət Turizm Agentliyi (DTA) Şüvəlan qəsəbəsində 3 yeni ictimai çimərliyin açılışını həyata keçirib. Bununla bağlı media tur təşkil olunaraq təqdimat mərasimi gerçəkləşdirilib.

Lakin diqqət çəkən məqam ondadır ki, açılış məhz çimərlik mövsümünün sonuncu günü – 31 avqust tarixində baş tutub. İctimaiyyət arasında bu addım birmənalı qarşılanmayıb. Sosial şəbəkələrdə və ekspert dairələrində bildirilib ki, yeni çimərliklərin təqdimatını gələn mövsümədək saxlamaq daha məqsədəuyğun olardı.

Məsələ ilə bağlı iradlar DTA rəhbəri Fuad Nağıyevin ünvanına yönəlib. Tənqidçilər hesab edirlər ki, mövsüm bitdikdən sonra çimərlik istifadəyə verilməsi təşkilatçılıq baxımından uğursuz qərardır. Onların fikrincə, bu cür yanaşma həm yerli vətəndaşlarda, həm də xarici turistlərdə çaşqınlıq yaradır.

Xatırladaq ki, Prezident İlham Əliyev bir müddət əvvəl Dövlət Turizm Agentliyinin fəaliyyətində yol verilən nöqsanlara görə Fuad Nağıyevə ciddi irad və töhmət vermişdi. Bu səbəbdən Agentliyin atdığı hər bir addım ictimaiyyət tərəfindən diqqətlə izlənilir.

Ekspertlər isə hesab edir ki, ölkəyə turist cəlb etmək üçün əsas şərtlərdən biri düzgün planlaşdırma və peşəkar təşkilatçılıqdır. Mövsümün sonunda çimərlik açılışı isə bu prinsiplərlə ziddiyyət təşkil edir.