USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
JMK: Fərid İsmayılova qarşı ölüm təhdidlərindən narahatıq
Beynəlxalq mətbuat azadlığı təşkilatı – Jurnalistləri Müdafiə Komitəsi (JMK) “Toplum TV”nin həbsdə olan əməkdaşı Fərid İsmayılova qarşı ölüm təhdidlərindən ciddi narahatlığını bildirib.
Təşkilat bu barədə “X” sosial şəbəkəsindəki səhifəsində açıqlama yayıb. Müraciətdə Azərbaycan hakimiyyətindən F.İsmayılovun təhlükəsizliyinin təmin olunması və o da daxil olmaqla “nahaq yerə həbs edilmiş” 25-dən çox jurnalistin azadlığa buraxılması tələb olunub.
Sentyabrın 29-da Bakı Ağır Cinayətlər Məhkəməsində “Toplum TV işi” üzrə keçirilən prosesdə çıxış edən F.İsmayılov, saxlandığı Bakı İstintaq Təcridxanasında yan kameradakı məhkumun onu öldürməklə hədələdiyini açıqlayıb.
“Toplum TV işi” çərçivəsində ümumilikdə 10 nəfərə cinayət işi açılıb. Onların arasında:
• III Respublika Platformasının spikeri Akif Qurbanov,
• qurucu heyət üzvü Ruslan İzzətli,
• “Toplum TV” həmtəsisçisi Ələsgər Məmmədli,
• videoredaktor Müşfiq Cabbar,
• jurnalist Fərid İsmayılov,
• Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev var.
Bundan başqa, jurnalist Elmir Abbasov polis nəzarətinə verilib, “Toplum TV” redaktoru Şahnaz Bəylərqızı isə əvvəlcə ev dustaqlığına buraxılıb, daha sonra barəsində polis nəzarəti tədbiri seçilib.
Qeyd edək ki, adıçəkilən şəxslər əvvəlcə qaçaqmalçılıqda ittiham olunublar, sonradan isə ittihamları ağırlaşdırılıb. Onlar bütün ittihamları rədd edir və həbslərinin siyasi sifarişlə həyata keçirildiyini bildirirlər.
