“Akkord İnşaat Sənaye” ASC-nin keçmiş sahibi İlqar Hacıyev Baş Prokurorluğa çağırılıb. Bu barədə məlumatı İctimai Televiziya yayıb.

Məlumata görə, İlqar Hacıyevə Azərbaycan Respublikası Cinayət Prosessual Məcəlləsinin 467-13.4-cü maddəsinə əsasən Baş Prokurorluğun İstintaq Baş İdarəsinə dəvət olunması barədə rəsmi bildiriş göndərilib. O, noyabrın 24-də saat 10:00-da Bakının Binəqədi rayonu, Süleyman Sani Axundov küçəsi 160 ünvanında yerləşən İstintaq Baş İdarəsinə gəlməlidir.

Baş Prokurorluq bildirib ki, İlqar Hacıyev barəsində 2017-ci ilədək qüvvədə olan AR Cinayət Məcəlləsinin 178.3.2-ci maddəsi (külli miqdarda dələduzluq) ilə təqsirləndirilən şəxs qismində cəlbetmə haqqında qərar qəbul edilib. Onun istintaqdan yayındığı, ölkəni tərk edərək gizləndiyi üçün barəsində axtarış elan olunduğu, Nərimanov Rayon Məhkəməsinin 13 yanvar 2021-ci il tarixli qərarı ilə isə qiyabi həbs qətimkan tədbiri seçildiyi qeyd olunub.

Qurum məlumat verib ki, noyabrın 14-də ittihamın məzmununa əlavələr və dəyişikliklər edilib və Hacıyev Cinayət Məcəlləsinin 1 dekabr 2017-ci ilədək qüvvədə olan 178.3.2 (külli miqdarda dələduzluq) və 193-1.3.2 (külli miqdarda əmlakın leqallaşdırılması) maddələri ilə təqsirləndirilən şəxs qismində yenidən cəlb olunub.

İttihama görə, İlqar Hacıyev 2016–2017-ci illərdə “SDI Group” MMC-nin rəhbəri olarkən öz qulluq mövqeyindən istifadə etməklə 10 milyon dollar (təxminən 16 milyon 270 min manat) məbləğində pulu Moskva və Bakı şəhərlərində alaraq zərərçəkmiş şəxsin külli miqdarda əmlakını dələduzluq yolu ilə ələ keçirib və sonradan leqallaşdırıb.

Təqsirləndirilən şəxsə çağırışa gəlmədiyi halda barəsində qiyabi icraatın açıla biləcəyi, qiyabi hökmün və ya məhkəmənin digər yekun qərarının verilə biləcəyi barədə xəbərdarlıq edilib.