Azərbaycan Xalq Cəbhəsi Partiyasının (AXCP) İmişli rayon şöbəsinin fəalı Vüqar Qədirlinin saxlanıldığı barədə məlumat yayılıb. Bu barədə “Azadlıq Qəzeti” xəbər verib.

Məlumata görə, Vüqar Qədirli dekabrın 12-si səhər saatlarında saxlanılıb. Onun əvvəlcə işlədiyi kafedə, daha sonra isə evində polis və mülki geyimli şəxslər tərəfindən axtarış aparıldığı bildirilir. Hazırda Qədirlinin harada saxlanıldığı və ona qarşı hansı ittihamların irəli sürüldüyü barədə rəsmi açıqlama yoxdur.

AXCP bildirir ki, partiyanın sədri Əli Kərimli də daxil olmaqla ümumilikdə 18 üzv hazırda həbsdədir. Dekabrın 1-də Əli Kərimli barəsində 2 ay 15 gün müddətinə həbs qətimkan tədbiri seçilib. Ona qarşı Cinayət Məcəlləsinin 278.1-ci maddəsi (hakimiyyəti zorla ələ keçirməyə və konstitusiya quruluşunu zorla dəyişməyə yönələn hərəkətlər) ilə ittiham irəli sürülüb.

Eyni gün AXCP Ali Məclisinin katibi Məmməd İbrahim barəsində də 2 ay yarım müddətinə həbs qətimkan tədbiri tətbiq edilib.

Həbs olunan AXCP üzvləri irəli sürülən ittihamları qəbul etmir və bunu siyasi fəaliyyətləri ilə əlaqələndirirlər.