USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Gültəkin Hacıbəyli Türkiyədə “xarici terrorçu” adı ilə saxlanıldığını bildirir
Milli Şuranın üzvü Gültəkin Hacıbəyli Türkiyədə “xarici terrorçu” kimi qeydiyyata alınaraq saxlanıldığını iddia edir. Bu barədə o, “Facebook” hesabında paylaşdığı müraciətində məlumat verib.
Siyasətçinin sözlərinə görə, o hazırda İstanbulda yerləşən Arnavutköy Geri Göndərmə Mərkəzində saxlanılır. Hacıbəyli bildirib ki, sentyabrın 25-də Türkiyəyə burada təhsil alan oğlunun yanına gəlib və ölkədə iki illik yaşayış icazəsi mövcuddur. Buna baxmayaraq, noyabrın 29-da polis əməkdaşları onu yaşadığı evdən zorla həmin mərkəzə aparıblar.
O deyir ki, barəsində G-82 maddəsi – “ictimai təhlükəsizliyə təhdid yaradan xarici terrorçulara” tətbiq edilən kateqoriya – ilə qərar verilib və Türkiyədən deportasiya edilərək Azərbaycana təhvil verilməsi üçün hazırlıq aparılır:
“Hazırda məni qanunsuz və əsassız şəkildə deportasiya etmək məqsədilə G-82 maddəsi tətbiq edilib və Azərbaycana göndərilməyim üçün hazırlıq gedir. Bununla bağlı təcili Avropa Məhkəməsinə müraciət edilib, həmçinin Türkiyədə məhkəməyə müraciət olunacaq.”
Hacıbəyli Türkiyə hakimiyyətini Azərbaycan hökumətinin təzyiqləri əsasında belə bir qərar verməməyə çağırıb:
“Mən 10 il Azərbaycanı Avropa Şurasında təmsil edən millət vəkili olmuşam, hər zaman dinc və demokratik mübarizə tərəfdarıyam. Siyasi fəaliyyətimdə heç vaxt qanun pozuntusuna yol verməmişəm. Məni ‘xarici terrorçu’ kimi deportasiya etmək yolverilməzdir.”
Siyasətçi qeyd edib ki, onun deportasiyası baş tutarsa, bu, həm ona qarşı haqsızlıq, həm də “Azərbaycan müxalifətinə qarşı repressiyalara Türkiyənin dəstək verməsi” kimi qiymətləndiriləcək. O, Azərbaycana göndərildiyi təqdirdə “saxta ittihamlarla” həbs olunacağını da bildirib.
