Ağsu rayonun 50-ci km-də yerləşən “Turan” kafesinin sahibi Nüşabə Cəfərova, rayon icra başçısı Vahid Tağıyevin göstərişi ilə obyektinin qərəzli şəkildə söküldüyünü bildirir. O, Hurriyyet.org-a obyektinin dəfələrlə yenidən standartlara uyğun təmir olunmasına baxmayaraq, xəbərsiz şəkildə söküntü işlərinin aparıldığını qeyd edib:

“Obyekt 1998-ci ildən mövcuddur. 2002-ci ildə biz almışıq. Standartlara uyğun olmadığına görə, sökülüb yenidən tikilməyini istədilər. 2005-ci ildə yenidən tikmişik. Obyekt yoldan 35 metr kənarda yerləşir. Məkan demək olar ki, hər sezona uyğun təmir olunur. Hazırda isə, bizə obyektin yenidən təmir olunmasını istəyirlər.Digər tərəfdən milli ornamentdə tikilmiş yerdir. Buna baxmayaraq, sökülməsini istəyirlər”.

Nüşabə Cəfərova, Ağsu rayon icra başçısı Vahid Tağıyevin söküntü işlərində Prezident Administrasiyasının məsul işçisi Zeynal Nağdəliyevin adından istifadə etdiyini deyib:

“Buranın sökülməsində Ağsu rayon icra başçısı Vahid Tağıyev, müavini Mirqubad Orucovun və Prezident Administrasiyasının məsul işçisi Zeynal Nağdəliyevin adından istifadə edərək söküldü. Söküntüyə gələnlər bu vəzifəli şəxslərdən göstəriş adlıqlarını bildirdilər. Ağsu aşırımının yenidən sökülüb tikiləcəyini və buranın turizm ərazisi olduğu bildirilərək obyektimiz söküldü. Bizim xəbərimiz olmadan obyektimizə daxil olunub və söküntü işləri aparılıb. Dəfələrlə Vahid Tağıyevə məktublar ünvanlasaq da cavabsız qalıb. Aidiyatı qurumlardan kömək edilməsini istəyirəm”.

Sahibkarın qardaşı Asif Cəfərov, məhkəmə qərarı olmadan söküntü işlərinin aparıldığını qeyd edib:

“Biz obyekt yeni və tam standartlara uyğun tikilmişdi. Hər dəfə ortalığa bir problem çıxarırdılar. Tək bizə deyil, digər obyekt sahiblərinə də eyni problem yaradılır. Hər dəfə də gələndə bunun başçının qərarı olduğunu deyirlər. Heç bir məhkəmə qərarı olmadan söküntü işləri aparılıb. Biz sonuna kimi mübarizəmizi davam etdirəcəyik. Avropa məhkməsinə kimi gedəcəyik. Bu münasibtdən sonra istər yerli, istərsə də xarici sahibkar Azərbaycanda iş görməyəcə cəhd belə etməz. Hazırda gördüyünüz kimi digər obyektlər tikilir. Niyə məhz bizim obyekt sökülür?”

Sözügeden məsələylə bağlı Ağsu Rayon icra başçısının müavini Miqubad Orucovla əlaqə saxladıq. Cənab müavin zəngimizə cavab vesə də, sadecə “salam” deyib telefon arxasından özünü eşitməməzliyə vurdu. Daha sonra isə, ümumiyyətlə zəng etmək mümkün olmadı. Hər halda bəlkə də deməyə sözü yoxuydu. Mirqubad Orucova xatırlatmaq istəyirik ki, tələb olunan informasiyanı adları çəkilən orqan və onların müavinləri, mətbuat xidmətinin işçiləri, yaxud digər səlahiyyətli şəxslər verə bilərlər. Digər tərəfdən Kütləvi informasiya vasitəsinin nümayəndəsi məlumatı verməkdən imtina edən dövlət orqanlarından, bələdiyyələrdən, idarə, müəssisə və təşkilatlardan, ictimai birliklərdən, siyasi partiyalardan və ya vəzifəli şəxslərdən Azərbaycan Respublikasının qanunvericiliyinə uyğun şəkildə şikayət etmək hüququna malikdir.

Növbəti işimiz Ağsu rayon İcra Hakimiyyətiylə əlaqə yaratmaq oldu. Mətbuat Xidmətinin nömrəsi verildi. Lakin, ordan da telefon əlaqəmizə cavab verən olmadı. Hər halda biz üzərimizə düşəni etdik. Dəfələrlə əlaqə saxlamağımıza baxmayaraq, Ağsu Rayon İcra Hakimiyyətindən məsul şəxs tapılmadı ki, suallarımıza cavab ala bilək…

Redaksiyadan: Mövzunu davam etdirəcəyik.