Liviyanın şərqində son iki gündə güclü tufan və daşqınlar nəticəsində 250-dən çox insan həlak olub.

Sosial şəbəkələrdə yayılan görüntülərdə “Daniel” qasırğasının Benqazi, Sus, Əl-Bayda, Əl-Mərc və Derna şəhərlərini vurması nəticəsində insanların avtomobillərində qaldığı görünür. İtkin düşənlər arasında Liviya Milli Ordusunun 7 üzvü də var.

Ölkədə üçgünlük milli matəm elan edilib.

***

Sel fəlakətində ölənlərin sayı 2 mini ötüb, minlərlə insan itkin hesab olunur.

Bu barədə Liviya rəsmiləri məlumat yayıb.

Liviyalı deputat əl-Hoca xarici mediaya açıqlamasında bildirib ki, ölkənin infrastrukturu bu kimi təbii fəlakətlərə hazır deyil:

“Binaların olduqca köhnə və baxımsız vəziyyətdə olması, küçələrin uzun müddət yenilənməməsi və s. hallar vəziyyəti daha da ağırlaşdırdı. Nəticədə xeyli sayda qaçqınımız var”.

***

Liviyada “Daniel” qasırğası nəticəsində ölənlərin sayı 2 800-ə çatıb.

Bu barədə “Anadolu”ya Liviyanın Qızıl Aypara Cəmiyyətindən bildirilib.

“Qızıl Aypara Cəmiyyətinin bütün şöbələrindən toplanan ümumi statistika 2 800 ölümdür”, - Cəmiyyətin adı çəkilməyən nümayəndəsi açıqlayıb.

Məlumata görə, hazırda təbii fəlakət bölgəsindən 7000-ə yaxın ailənin xilas edilməsi üçün əməliyyat aparılır.