İranın paytaxtı Tehranda İsrailin hava hücumları nəticəsində silsilə partlayışlar baş verib. Hücumlar şəhərin müxtəlif bölgələrində yaşayış binaları və mülki obyektlərə ciddi ziyan vurub. Bu barədə İranın dövlət televiziyası məlumat yayıb.

İlkin məlumatlara görə, hücum nəticəsində azı 50 nəfər yaralanıb, onlardan 35-i qadın və uşaqdır. Hadisə yerində axtarış-xilasetmə işləri davam edir. Ölənlər barədə hələlik dəqiq məlumat verilməyib.

İsrail Müdafiə Qüvvələrinin (IDF) mətbuat xidməti daha əvvəl açıqlama yayaraq, İsrail Hərbi Hava Qüvvələrinin İranda nüvə proqramı və hərbi obyektlərlə əlaqəli olduğu iddia edilən onlarla strateji hədəfə zərbələr endirdiyini bildirib.

Hadisə regionda gərginliyi daha da artırıb. Beynəlxalq təşkilatlar tərəfləri münaqişənin daha da dərinləşməsinin qarşısını almağa çağırır.