Serbiyada hökumət əleyhinə etirazlar daha da gərginləşib. “Reuters”in məlumatına görə, Novi Sad şəhərində etirazçılar hakim Serb Tərəqqi Partiyasının (SPS) ofisini dağıdıb, paytaxt Belqradda isə polis və partiya tərəfdarları ilə toqquşmalar yaşanıb.

Ölkənin ikinci ən böyük şəhəri Novi Sadda onlarla etirazçı partiya ofisinin pəncərələrini sındırıb, mebelləri və SPS-ə aid əşyaları binadan atıb, qapılarına boya səpib. Hadisədən sonra tam təchiz olunmuş polis şəhər mərkəzindəki bir neçə məhəlləni mühasirəyə alaraq izdihamı dağıtmaq üçün gözyaşardıcı qazdan istifadə edib.

Belqradda da gərginlik yaşanıb. Şəhərin əsas bulvarlarından birində yüzlərlə etirazçı ilə SPS tərəfdarları bir-birinə məşəl və fişənglər atıb. Toqquşmalar zamanı 45 polis əməkdaşı xəsarət alıb.

Xatırladaq ki, Serbiyada tələbələrin və müxalifətin etirazları 2024-cü il noyabrın 1-də Novi Sadda qatar stansiyasında tavanın uçması və 16 nəfərin ölümü ilə nəticələnən faciədən sonra başlayıb. Etirazçılar növbədənkənar parlament seçkilərinin keçirilməsini və hökumətin istefasını tələb edirlər.