Qəzza zolağına nəzarət edən HƏMAS qruplaşması oktyabrın 3-də ABŞ prezidenti Donald Trampın bu həftə irəli sürdüyü sülh planına cavab verib.

Qruplaşma bəyan edib ki, əsirlikdə saxladığı israilliləri azad etməyə və bunun üçün vasitəçilər vasitəsilə danışıqlara başlamağa hazırdır.

“Bu kontekstdə hərəkat vasitəçilər vasitəsilə dərhal danışıqlara girməyə və bunun detallarını müzakirə etməyə razıdır”, – bəyanatda deyilir.

Bununla yanaşı, HƏMAS Trampın təklifində yer alan və Qəzzanın idarəetməsinin onun özü ilə yanaşı keçmiş Böyük Britaniya baş naziri Toni Bleyrin də daxil olduğu “Sülh Şurası”na verilməsi ideyasını rədd edib.

“Hərəkat Qəzzanın idarəsini fələstinli müstəqil şəxslərdən ibarət, milli konsensus və ərəb-İslam dəstəyi əsasında formalaşan bir quruma təhvil verməyə razıdır”, – bəyanatda qeyd olunub.

HƏMAS Trampın təklifinin bütün maddələrini qəbul etməsə də, ABŞ prezidenti əsirlərin azad edilməsi ilə bağlı razılığı müsbət qarşılayıb.

“HƏMAS-ın yeni bəyanatına əsasən, inanıram ki, onlar davamlı sülh üçün hazırdırlar. İsrail dərhal Qəzzanı bombalamağı dayandırmalıdır ki, biz girovları təhlükəsiz və tez bir zamanda çıxara bilək”, – Tramp “Truth Social” hesabında yazıb.

O əlavə edib ki, hazırkı vəziyyət “həddindən artıq təhlükəlidir”, lakin tərəflər “detallar üzərində müzakirələr aparırlar” və bu təşəbbüs “təkcə Qəzzaya deyil, bütün Yaxın Şərqdə sülhə” yönəlib.

HƏMAS rəsmiləri bildiriblər ki, onlar 20 maddəlik sülh planının bütün bəndləri ilə razı deyillər və bəzi məsələlərin üzərində əlavə danışıqlara ehtiyac var.

Bu məsələlərdən biri də Qəzzanın silahsızlaşdırılması tələbidir.

HƏMAS rəsmisi Musa Əbu Mərzuk “Al-Jazeera”yə açıqlamasında bildirib ki, qruplaşma İsrail işğalı sona çatmadan silahı yerə qoymayacaq.

“Prezident Trampın təklifində Qəzzanın gələcəyi və Fələstin xalqının ayrılmaz hüquqları ilə bağlı məsələlər milli mövqeyə bağlıdır və yalnız milli çərçivədə müzakirə oluna bilər,” – HƏMAS-ın son bəyanatında qeyd edilib.

Fransa prezidenti Emmanuel Makron da HƏMAS-ın bəyanatını müsbət addım kimi qiymətləndirib. O, “X” platformasında yazıb:

“Əsirlərin azad edilməsi və atəşkəs vaxt itirmədən təmin olunmalıdır.”

İsrail tərəfi isə hələlik nə HƏMAS-ın, nə də Trampın açıqlamasına rəsmi cavab verməyib.

Trampın müharibənin dayandırılması çağırışına baxmayaraq, İsrail ordusu oktyabrın 4-də Qəzza zolağını bombalamağa davam edib. Yerli səhiyyə rəsmilərinin məlumatına görə, həmin gün səhər saatlarında 22 Qəzza sakini həlak olub.

2023-cü ilin oktyabrından başlayan İsrail–HƏMAS müharibəsi nəticəsində indiyədək 60 minə yaxın insan həlak olub, onların 20 minə yaxını uşaqlardır.