ABŞ Prezidenti Donald Trump İranın enerji infrastrukturuna planlaşdırılan zərbələrin iki həftə müddətinə təxirə salındığını açıqlayıb.

ABŞ lideri bu barədə özünün Truth Social hesabında paylaşım edib. O bildirib ki, Pakistanın Baş naziri Shehbaz Sharif və Pakistan ordusunun feldmarşalı Asim Munir ilə aparılan danışıqlardan sonra belə qərar verilib.

Trampın sözlərinə görə, Pakistan tərəfi İrana göndərilən dağıdıcı qüvvənin qarşısının alınmasını xahiş edib və İran Hörmüz boğazının tam, dərhal və təhlükəsiz şəkildə açılmasına razılıq verib. Bunun əsasında ABŞ İranın bombardmanını və hücumunu iki həftə müddətinə dayandırmağa razılaşıb və bu addımın ikitərəfli atəşkəs xarakteri daşıdığı qeyd olunub.

ABŞ prezidenti bildirib ki, artıq bütün hərbi məqsədlərə nail olunub və İranla uzunmüddətli sülh sazişi üzərində ciddi irəliləyiş əldə edilib. Onun sözlərinə görə, İran tərəfindən təqdim olunan 10 bəndlik təklif danışıqlar üçün işlək əsas hesab olunur və iki həftəlik müddət yekun razılaşmanın hazırlanmasına imkan verəcək.

Tramp vurğulayıb ki, məqsəd İranla uzunmüddətli sülhə nail olmaq və Yaxın Şərqdə sabitliyi təmin etməkdir.