İsrailin İrana qarşı həyata keçirdiyi hərbi əməliyyatlar nəticəsində daha bir iranlı nüvə aliminin həlak olduğu məlum olub. Məlumata görə, nüvə fizikası üzrə mütəxəssis, Süleyman Süleymani İsrailin son hücumları zamanı həyatını itirib.

Süleymani İran İslam Respublikası Elmi-Texnologiya Universitetinin kimya fakültəsinin məzunu olub və ölkənin nüvə proqramında mühüm rol oynadığı bildirilir.

Qeyd edək ki, bundan əvvəl İran mediası 13-24 iyun tarixləri arasında həyata keçirilən İsrail hava hücumları nəticəsində azı doqquz nüvə fizikinin öldüyünü açıqlamışdı. Son hadisə ilə bu rəqəm daha da artmış olur.

Xatırladaq ki, İsrail 13 iyun gecəsi İrana qarşı genişmiqyaslı hərbi əməliyyata başlayıb. Təxminən 24 saat sonra İran cavab zərbələri endirib və qarşılıqlı atəşlər bir neçə gün davam edib. İyunun 22-də ABŞ münaqişəyə qoşularaq İsfahan, Fordo və Natanzda yerləşən strateji nüvə obyektlərinə hava zərbələri endirib.

Bunun cavabında iyunun 23-də İran ABŞ-nin Yaxın Şərqdəki əsas hərbi dayağı sayılan Qətərdəki “Əl-Udeyd” hava bazasına raket zərbəsi endirib. Gərginliyin artdığı bir vaxtda, ABŞ prezidenti Donald Tramp iyunun 24-də İsrail və İranın atəşi tamamilə dayandırmağa razılaşdığını bəyan edib. Həmin gün atəşkəs qüvvəyə minib.

Hazırda bölgədə vəziyyət nisbi sabitliklə müşahidə olunsa da, tərəflər arasında gərginlik davam edir.