Bu gün bir qrup terrorçunun Ermənistan parlamentində terror aktı törətməsindən 22 il ötür.

Axar.az xatırladır ki, 1999-cu il oktyabrın 27-də Nairi Hunanyan başda olmaqla bir neçə terrorçu Ermənistan parlamentinin binasına soxularaq spiker Karen Dəmirçiyanı, baş nazir Vazgen Sərkisyanı, spikerin müavinləri Yuri Baxşiyanı və Ruben Miroyanı, operativ məsələlər üzrə nazir Leonard Petrosyanı, deputatlar Armenak Armenakyan, Henrix Abramyan və Mikael Kotanyanı güllələyiblər.

Öldürülən şəxslər həmin vaxt Azərbaycanın işğal edilmiş 7 rayonunu qaytararaq, Bakı ilə sülh müqaviləsi imzalamağın tərəfdarı idilər. Məhz həmin terror hadisəsindən sonra Ermənistanda heç bir siyasi qüvvə Azərbaycanla birbaşa danışıqlara cəsarət etmədi. Bu hadisə sayəsində Azərbaycanla Ermənistan arasında noyabrda İstanbulda imzalanması planlaşdırılan razılaşma ləğv olundu.

Terrorçuların məhkəməsi 2001-ci ildən 2003-cü ilə qədər davam edib. Qrup lideri Nairi Hunanyan da daxil olmaqla, 6 terrorçu ömürlük həbs cəzasına məhkum edilib. Qrupun digər üzvü 14 il həbs cəzası alıb.